Bydd Gŵyl Hydref Bwyd Da Caerdydd yn dychwelyd i’r ddinas ym mis Medi ac mae Bwyd Caerdydd yn cynnig grantiau i grwpiau cymunedol er mwyn eu helpu i gymryd rhan.
Drwy gydol y mis, cynhelir gweithgareddau am ddim mewn cymdogaethau ar draws y ddinas gan ddechrau gydag Ardal Bwyd Da Caerdydd bwrpasol i groesawu’r 25,000 o ymwelwyr sy’n mynychu Gŵyl Fwyd Amgueddfa Cymru yn Sain Ffagan.
Mewn partneriaeth â C3SC, mae Bwyd Caerdydd yn cynnig grantiau bach o hyd at £200 i alluogi grwpiau dielw i gynnal digwyddiadau neu weithgareddau fel rhan o’r ŵyl. Gall unrhyw un wneud cais cyn belled â bod y digwyddiad yn hyrwyddo 5 Nod ar gyfer Bwyd Da Bwyd Caerdydd sy’n cefnogi cais y ddinas i ddod yn un o ddinasoedd bwyd mwyaf cynaliadwy’r DU.
Yn rhan o strategaeth bwyd da ar gyfer y ddinas gyfan, mae’r Nodau Bwyd Da yn ceisio sicrhau bod gan bobl fynediad i fwyd iach a chynaliadwy a bod gan Gaerdydd fudiad bwyd sy’n grymuso pobl, economi fwyd leol ffyniannus a system fwyd deg, gydgysylltiedig.
Bob blwyddyn ers 2021, mae Gŵyl Hydref Bwyd Da Caerdydd wedi bod yn dathlu’r mwynhad a geir yn sgil tyfu, coginio a rhannu bwyd da. Dros y pedair gŵyl, mae tua 50 o sefydliadau sy’n aelodau o Bwyd Caerdydd wedi cymryd rhan, gan gynnal dros 100 o ddigwyddiadau a chroesawu bron i 8,000 o bobl. Rhannwyd mwy na 2,000 o brydau bwyd a dosbarthwyd mwy na 5,000 o blanhigion a phecynnau hadau.
Dros y pedair Gŵyl Hydref flaenorol, mae Bwyd Caerdydd wedi sicrhau. ac, mewn partneriaeth â C3SC, wedi dosbarthu £10,000 mewn grantiau bach i gefnogi grwpiau i gynnal gweithgareddau.
Dywedodd Cydlynydd Bwyd Caerdydd, Pearl Costello:
“Ein ffocws eleni, ar gyfer ein holl ddigwyddiadau, yw dathlu’r cyfoeth o gynnyrch tymhorol. Mae’r cynhaeaf yn gyfle gwych i ddod â phobl ynghyd i ailgysylltu â chynnyrch tymhorol, cynaliadwyedd a blas gwych yr hyn y maent yn ei goginio, yn ei fwyta ac yn ei dyfu.
“Rydym yn gwerthfawrogi bod hwn yn gyfnod heriol, felly rydym yn awyddus iawn i weld cymaint o sefydliadau â phosibl yn manteisio ar ein cynllun grantiau i gynnal digwyddiad bwyd neu dyfu bwyd, ac i deimlo’n rhan o’r mudiad bwyd da cyffredinol yng Nghaerdydd.
“Eleni, mae gennym ddiddordeb arbennig mewn digwyddiadau neu weithgareddau a fydd yn helpu i ddod â chymunedau, cymdogaethau neu aelwydydd at ei gilydd drwy fwyd – yn ddelfrydol, digwyddiadau sy’n cael eu datblygu mewn partneriaeth â’r bobl a fydd yn elwa ohonynt ac sy’n cynnwys ystod amrywiol o gymunedau ledled Caerdydd,” meddai.
Gall grwpiau cymunedol a sefydliadau dielw wneud cais am raglen grantiau bach Bwyd Caerdydd ar sail dreigl tan 19 Gorffennaf yn foodcardiff.com. Ochr yn ochr â’r grantiau, gall Bwyd Caerdydd hefyd gynnig cymorth i hyrwyddo digwyddiadau, cysylltu â sefydliadau rhwydwaith eraill a darparu adnoddau ar gyfer gwerthuso ar ôl y digwyddiad.
Gall unrhyw sefydliad, p’un a yw wedi cael grant ai peidio, gyflwyno gwybodaeth am ddigwyddiad perthnasol drwy wefan Bwyd Caerdydd i’w gynnwys yn yr ŵyl.
Mae Bwyd Caerdydd yn cynnal sesiynau ar-lein ar gyfer grwpiau cymunedol i’ch helpu i gymryd rhan. Mae’r sesiwn hon yn cynnig cyfle i chi ddarganfod mwy am Ŵyl Hydref Bwyd Da Caerdydd a pha gymorth sydd ar gael gan Bwyd Caerdydd. Bydd hefyd yn gyfle i ofyn unrhyw gwestiynau, cael ysbrydoliaeth a syniadau ar gyfer digwyddiadau a chwrdd â grwpiau a sefydliadau eraill a allai gymryd rhan neu sydd â diddordeb mewn cydweithio.
Briff a Chwestiynau Cyffredin Gŵyl Fwyd yr Hydref Bwyd Da Caerdydd: Sesiwn 1 – 18 Mehefin am 12-12.45pm: Cofrestwch
Briff a Chwestiynau Cyffredin Gŵyl Fwyd yr Hydref Bwyd Da Caerdydd: Sesiwn 2 – 18 Mehefin am 5.30-6.15pm: Cofrestwch
