Mae coffi yn ddefod ddyddiol i filiynau ohonom – ond beth sy’n digwydd ar ôl i’r diferyn olaf gael ei dywallt? Yn y DU yn unig, amcangyfrifir bod 500,000 o dunelli o waddodion coffi yn cael eu taflu bob blwyddyn, sy’n aml yn cael eu hanfon i safleoedd tirlenwi lle maent yn cyfrannu at allyriadau methan niweidiol. Mae un fenter gymdeithasol, Grounds for Good, yn newid y naratif hwnnw gydag ateb creadigol ac effeithiol i’r broblem: Cynllun Ailgylchu Coffi sydd yr un mor llesol i’r blaned ag y mae i bobl.

Ynglŷn â Grounds for Good

Sefydlwyd Grounds for Good gan Dr. Rosie Oretti, cyn seiciatrydd ymgynghorol yn y GIG a adawodd ei gyrfa feddygol i lansio busnes coffi ac iddo bwrpas ehangach. Gyda nod clir o gyfuno cynaliadwyedd amgylcheddol â chyfiawnder cymdeithasol, mae’r cwmni’n gweithredu ar draws y meysydd economi gylchol, eiriolaeth iechyd meddwl, a llesiant cymunedol.

Mae Grounds for Good yn rhostio coffi moesegol ac yn ail-fuddsoddi’r holl elw mewn prosiectau iechyd meddwl – yn enwedig rhai ar gyfer pobl ifanc, cyn-droseddwyr, ac unigolion sy’n wynebu cael eu hallgáu’n gymdeithasol.

Y Cynllun Ailgylchu Coffi

Wrth wraidd model cylchol y cwmni mae cynllun ailgylchu arloesol sy’n casglu gwaddodion coffi o gaffis, gweithleoedd, a lleoliadau lletygarwch. Yna mae’r gwaddodion hyn yn cael eu huwchgylchu a’u troi’n gynhyrchion cynaliadwy fel:

• Nwyddau gofal croen a lles
• Logiau tân a thanwydd ecogyfeillgar
• Compost a gwrtaith naturiol
• Sebon a sgrwb croen wedi’u gwneud â llaw

Mae’r fenter hon yn dargyfeirio gwastraff organig o safleoedd tirlenwi gan greu cyfleoedd ar gyfer gweithgynhyrchu moesegol ac addysg.

Defnyddir yr holl elw o’r cynhyrchion coffi wedi’u hailgylchu i gefnogi rhaglenni iechyd meddwl cymunedol yn uniongyrchol. Mae Grounds for Good yn cynnal gweithdai a sesiynau therapiwtig mewn cydweithrediad ag ysgolion, elusennau, a gwasanaethau adsefydlu, gan ganolbwyntio ar rymuso unigolion drwy greadigrwydd, sefydlu trefn, a chefnogaeth.

Mae’r cynllun ailgylchu yn enghraifft bwerus o sut y gall busnesau integreiddio cyfrifoldeb amgylcheddol ac effaith gymdeithasol – a nawr mae’r cwmni’n gwahodd mwy o leoliadau i ymuno â’r mudiad.

Pam Ymuno?

I gaffis, siopau coffi, a lleoliadau lletygarwch, mae ymuno â’r cynllun yn ffordd syml ond ystyrlon o:

• Leihau gwastraff ac ôl troed carbon
• Cefnogi rhaglenni iechyd meddwl ac adsefydlu
• Denu cwsmeriaid drwy fenter cynaliadwyedd weladwy
• Cyd-fynd â nodau Amgylcheddol, Cymdeithasol a Llywodraethu ac arferion busnes cyfrifol

Mae’n hawdd trefnu mannau casglu, ac mae Grounds for Good yn darparu’r holl ganllawiau sydd eu hangen arnoch i ddechrau arni.

Cymerwch Ran

Mae Grounds for Good wrthi’n ehangu’r cynllun ac yn chwilio am bartneriaid newydd ledled y DU. Boed yn gaffi bach neu’n gwmni cadwyn lletygarwch mawr, mae gan bob lleoliad y pŵer i wneud gwahaniaeth — un gwastraff coffi ar y tro.

I gael gwybod sut i gymryd rhan yn y Cynllun Ailgylchu Coffi, ewch i groundsforgood.co.uk neu cysylltwch â Rosie o dîm Grounds for Good yn uniongyrchol yn hello@groundsforgood.co.uk.